அரசாங்கத்தின் நாடாளுமன்ற உறுப்பினர் கொடுப்பனவுகள் கையாளப்படுவது குறித்து பிவிதுரு ஹெல உருமய (PHU) கட்சியின் தலைவரும் சட்டத்தரணியுமான உதய கம்மன்பில இன்று (திங்கட்கிழமை) விமர்சனம் வெளியிட்டுள்ளார். உத்தியோகபூர்வ நோக்கங்களுக்காக வழங்கப்படும் பொது நிதியை அரசியல் கட்சி நிதிக்கு வழங்குவது சட்டப்படி குற்றம் என்று அவர் குறிப்பிட்டுள்ளார்.
எம்.பி.க்கள் தங்கள் கொடுப்பனவுகளை கட்சி நிதிகளுக்கு வழங்குவதைத் தடை செய்யக் கோரும் தயாசிறி ஜயசேகரவின் முன்மொழிவுக்குப் பதிலளித்த கம்மன்பில, தனிப்பட்ட சம்பளத்தை செலவழிப்பதற்கும் பொதுக் கொடுப்பனவுகளை தவறாகப் பயன்படுத்துவதற்கும் இடையில் தெளிவான வேறுபாடு உள்ளது என்றார்.
எம்.பி.க்கள் தங்கள் தனிப்பட்ட வருமானத்தை தாங்கள் விரும்பியவாறு பயன்படுத்த சுதந்திரம் உண்டு என்றாலும், அலுவலகங்கள், எரிபொருள், தகவல் தொடர்பு மற்றும் போக்குவரத்து போன்ற கொடுப்பனவுகள் குறிப்பிட்ட பொது நோக்கங்களுக்காகவே கண்டிப்பாகச் செலவிடப்பட வேண்டும் என்று அவர் விளக்கினார்.
”வாடகை, மின்சாரம் அல்லது உபகரணங்கள் போன்ற அலுவலகத்தை பராமரிப்பதற்காக வழங்கப்படும் நிதியை ஒரு கட்சிக்கு வழங்க முடியாது. அவ்வாறு செய்வது பொதுப் பணத்தை தவறாகப் பயன்படுத்துவதாகும்,” என்று அவர் கூறினார்.
இத்தகைய நடவடிக்கைகள் பொதுச் சொத்துக்களை முறைகேடாகப் பயன்படுத்துவதற்குச் சமம் என்றும், இது பிணை வழங்க முடியாத குற்றம் என்றும் கம்மன்பில எச்சரித்தார். “இந்த பொது நிதியை தவறாகப் பயன்படுத்தும் ஆளும் தரப்பைச் சேர்ந்த அனைத்து 159 எம்.பி.க்களும் ஒரு கடுமையான குற்றத்தைச் செய்கிறார்கள். அடுத்த அரசாங்கத்தின் கீழ், அவர்களுக்காக வெலிக்கடை சிறைச்சாலையில் ஒரு முழு பிரிவும் ஒதுக்கப்பட வேண்டும்,” என்றும் அவர் ஆவேசமாக அறிவித்தார்.
