இலங்கையின் பொலிஸ் மா அதிபரும், சட்டத்தரணியுமான பிரியந்த வீரசூரிய, திட்டமிட்ட போதைப்பொருள் கடத்தல் மற்றும் குற்றவியல் வலையமைப்புகளுடன் தொடர்புடைய தனிநபர்கள் இலங்கையின் அரசியல் நிலப்பரப்பில் தீவிரமாக ஊடுருவ முயற்சிப்பதாக எச்சரித்துள்ளார்.
இந்த தனிநபர்களில் சிலர் ஏற்கனவே அரசியலில் நுழைந்துள்ளதாகவும், எதிர்கால தேசிய தேர்தல்களில் போட்டியிட தயாராகி வருவதாகவும் பொலிஸ் மா அதிபர் தெரிவித்தார்.
”இது அரசியல் கட்சிகள் அவசரமாக கவனம் செலுத்த வேண்டிய ஒரு விடயம். திட்டமிட்ட குற்றங்கள் மற்றும் போதைப்பொருட்களுடன் தொடர்பு கொண்ட நபர்களுக்கு உறுப்பினர் பதவியை அல்லது வேட்பாளராக வாய்ப்பை வழங்குவதா என்று அவர்கள் தீர்மானிக்க வேண்டும்,” என்று வீரசூரிய கூறினார்.
இந்த பிரச்சினை கட்சி எல்லைகளை கடந்தது என்றும், அனைத்து அரசியல் தளங்களிலும் வெளிப்படையான உரையாடல் மற்றும் பொறுப்புக்கூறல் தேவை என்றும் அவர் வலியுறுத்தினார்.
பொலிஸ் மா அதிபரின் கூற்றுப்படி, இந்த குற்றவியல் பிரமுகர்கள், பொதுச் சேவை என்ற போர்வையில் தங்கள் சட்டவிரோத நடவடிக்கைகளை மறைக்க, அரசியல் சட்டபூர்வ தன்மையை ஒரு கேடயமாகப் பயன்படுத்துகின்றனர்.
”அவர்கள் வெள்ளைத் துணி அணிந்து இருண்ட செயல்களை செய்கிறார்கள். போதைப்பொருள் கடத்தல் மற்றும் திட்டமிட்ட குற்றங்களுக்கு ஒரு மறைவாக அரசியலை பயன்படுத்துவதே அவர்களின் குறிக்கோள்,” என்றும் அவர் மேலும் தெரிவித்தார்.
