சுகாதார அமைச்சின் வைத்திய பிரிவின் நடவடிக்கைகள் காரணமாக, நாட்டில் 23,000 க்கும் மேற்பட்ட வைத்தியர்களின் இடமாற்றங்களில் சிக்கல்கள் எழுந்துள்ளதாக அரச மருத்துவ அதிகாரிகள் சங்கம் தெரிவித்துள்ளது. தர வைத்தியர்களின் வருடாந்திர இடமாற்றங்கள் தொடர்பாக பல கடுமையான சிக்கல்கள் எழுந்துள்ளதாகவும், அதன்படி, சுகாதார அமைப்பில் தேவையற்ற சிக்கல் உருவாக்கப்படுவதாகவும் சங்கத்தின் ஊடகப் பேச்சாளர் வைத்தியர் சமில் விஜேசிங்க தெரிவித்தார்.
இந்த இடமாற்ற நடைமுறைகள் நிறுவன குறியீட்டில் தெளிவாகக் குறிப்பிடப்படடுள்ளதாக கூறிய வைத்தியர் சமில் விஜேசிங்க, சுகாதார அமைச்சின் வைத்திய சேவைகள் பிரிவின் தன்னிச்சையான செயற்பாடுகள் காரணமாக இந்த சிக்கல்கள் இப்போது எழுந்துள்ளன என்றும் கூறினார்.
இதன் விளைவாக, நாட்டில் சுமார் 23,000 வைத்தியர்களின் இடமாற்றங்கள் தொடர்பாக சிக்கல்கள் எழுந்துள்ளதுடன், 10,000க்கும் மேற்பட்ட தர வைத்தியர்களின் இடமாற்றங்கள் செயல்படுத்தப்படவில்லை என்று வைத்தியர் கூறினார்.
அத்துடன் நாட்டில் சுமார் 50% வைத்தியர்கள் தற்போது அவர்களுக்கு உரிய வைத்தியசாலைகளில் பணியமர்த்தப்படவில்லை என்றும் வைத்தியர் சமில் விஜேசிங்க மேலும் கூறினார்.
